Bilaketaren emaitzak - Kahlo, Frida

Frida Kahlo

Magdalena Frida Carmen Kahlo y Calderón, Frida Kahlo izenez ezaguna (Coyoacán, Mexiko Hiria, Mexiko, 1907ko uztailaren 6a – 1954ko uztailaren 13a), autorretratuengatik ospetsua izan zen margolari mexikarra. Bere lana bere bizitza pertsonaleko bizipenen ingurukoa da. Guztira, 150 lan tindatu zituen, batez ere autorretratuak, eta, horietan, bizirauteko zituen zailtasunak proiektatu zituen. Mexikoko pop kulturaren ikonotzat ere hartzen dute.

Gaztetan, autobus-istripu larria izan zuen, eta denbora luzez egon zen ohean etzanda. Guztira, 32 ebakuntza egin behar izan zizkioten.​ Bizimodu ez-konbentzionala eraman zuen.​ Fridaren obrak eta bere senarra zen Diego Rivera margolariarenak elkarri eragin zioten. Biek partekatu zuten sustrai indigenak dituen Mexikoko herri-artearekiko gustua iraultza osteko garaiko beste margolari mexikar batzuk inspiratuz.

1939an, haren margolanak Frantzian erakutsi zituzten André Bretonen gonbita jaso ondoren, eta «surrealistak» zirela konbentzitzen saiatu zen. Hala ere, Fridak ez zuen bere artea joera horretan islatuta ikusten, bere ustez, ez zituelako ametsak margotzen bere bizitza baizik. Erakusketa horretako obretako bat (''Autorretratua - Markoa'', gaur egun Pompidou Zentroan dagoena) Louvre Museoak erositako artista mexikar baten lehen margolan bihurtu zen. Bere lanak garaiko margolari eta intelektual ospetsuen miresmena jaso zuen, hala nola, Pablo Picasso, Vasili Kandinski, André Breton, Marcel Duchamp, Tina Modotti eta Concha Michel. 1954ko uztailaren 13an hil zen, 47 urte zituela. Haren gorpua erraustu egin zuten, eta haren errautsak Etxe Urdinera eraman zituzten, gaur egun Frida Kahlo Museoa izenez ezagutzen dena. Wikipediatik informazioa lortu